黃大仙創意茶餐廳 食雞蛋仔Pizza
以革新港式茶餐廳文化為賣點的茶餐廳2.0，新分店進駐黃大仙。餐廳位置開揚，特設半露天茶座，食茶記都變得更有格調同講究。新店推出多款融合港式風味的國際美食，賣相精緻又抵食。更有不同口味特飲，特別推薦日本南瓜焦糖奶昔，入口有綿密的南瓜細蓉，混合日本牛奶及奶油，倍添奶香。
另有港式小食如雞蛋仔，店家亦不忘自創2.0版本雞蛋仔Pizza，一改Pizza傳統餅底，轉為雞蛋仔口感。面層澆上特製醬汁，食客可以隨個人喜好挑選黑松露醬野菌或千島三文魚款式。雞蛋仔外脆內軟，富濃烈蛋香，配上醬汁更入味。
茶餐廳2.0
地址︰黃大仙睦鄰街8號現崇山商場地下G1-G2號舗
電話︰2111 2568
你或有興趣的文章：
点心代表 x 熊本熊 可愛點心登場
秋冬滋味蟹逅 5大精選
2019-11-08,週五
宜蘭民宿私房食譜 棒打綠豆糕
位於宜蘭的逢春園渡假別墅，曾兩次獲得HotelsCombined全球旅宿卓越大獎、Tripadvisor優良民宿獎。店家不時在民宿內舉辦「逢春廚娘」工作坊，讓客人學習製作台灣美食，今次分享的棒打綠豆糕，就是其中一款，即製即食，豆味香濃，而且入口融化。名為棒打，亦希望客人透過用木棒打壓綠豆，紓緩情緒壓力。
逢春園：https://fengchunvilla.com.tw/
材料：
綠豆仁 300克
清水 300毫升
砂糖 100克
嘉應子 適量
做法：
1.綠豆仁洗淨，以熱水300毫升泡90分鐘。
2.用電鍋蒸煮約20分鐘，慢火燜10分鐘。
3.拌入砂糖，趁熱壓成泥，再分小份。
4.豆溶揉成糰子，中間放進嘉應子。
5.完成品每粒約25克，用模具定型。
你或有興趣的文章：
【陳家廚坊煲湯系列】果皮陳皮大不同 切絲煲湯最理想
【家常系列】 薯仔炆排骨
2019-11-06,週三
【家常系列】蟲草花雲耳蒸雞肉
蟲草花健脾益肺，又可以降膽固醇，煮餸煲湯都合適。今次用啖啖肉嘅雞扒配蟲草花、雲耳一齊蒸，整一道菜可以食到咁多材料，係咪方便先！
材料：
雞扒 1塊
蟲草花 1/3碗
雲耳 1/3碗
冬菇 8-10隻
薑絲 適量
紅棗 6粒
調味：油、鹽、糖、蠔油、胡椒粉、酒、豉油，各適量
做法：
1.雞扒去皮，用鹽洗淨，沖淨後切件。
2.雞件與薑絲、胡椒粉、酒及豉油調味。
3.冬菇浸軟、去蒂及切片。
4.浸發雲耳，用鹽洗刷後瀝乾水。
5.蟲草花用清水浸軟。
6.雲耳、冬菇、油、糖、蠔油拌勻。
7.加入雞件、蟲草花、紅棗蒸12分鐘。
你或有興趣的文章：
【女煮人Kinki系列】月見汁和牛粒飯
【家常系列】 薯仔炆排骨
2019-11-05,週二
秋冬滋味蟹逅 5大精選
又到食大閘蟹嘅好時節，坊間大閘蟹菜式多不勝數，除咗散點菜式，又有大閘蟹宴，花多眼亂唔知點揀好，等我哋推薦俾你！
蟹粉拌墨魚汁拉麵
全港首創蟹粉拌墨魚汁拉麵，墨魚汁製成的拉麵非常爽滑，沾上香濃蟹粉，鮮味十足。烏黑旳拉麵鋪上金黃蟹粉，賣相吸引。另有蟹粉蛋白薑米炒飯，將薑剁成薑米，混和到炒飯中，薑米微辛，更顯得蟹粉鮮香。
翡翠拉麵小籠包
地址：銅鑼灣勿地臣街1號時代廣場B2樓B221A號舖
查詢：2506 0080
蟹粉餛飩湯麵
為自家招牌菜式添新意，說的是蟹粉餛飩湯麵，將蟹粉混入上海傳統餛飩湯麵內，變成香氣撲鼻的蟹粉湯底，與沾上蟹粉的素鵝一樣，味道層次升級！
上海姥姥
地址：銅鑼灣百德新街22-36號翡翠明珠廣場1樓Festiva 7號舖
查詢：2587 9118
鮮蟹粉鍋巴
在經典上海菜中加入時令蟹粉，例如上海小籠包加入手工生拆蟹粉製成小籠包，湯汁混合蟹膏黃油，香氣四溢。香脆可口的鍋巴也加了金黃蟹粉，蟹油滲入脆米中，甘香！
家上海
地址：大角咀海泓道1號奧海城三期地下G19-21號舖
查詢：2869 2228
蟹粉香煎日本溏心帶子
介紹大閘蟹，怎少得原隻清蒸，客人自選來自江蘇或北海道的大閘蟹，沾上特調醬汁，盡嚐大閘蟹獨有清香。蟹粉亦可當成海鮮絕佳調味，例如為溏心的鮮甜帶子配上鮮香蟹粉，口感一流。
大公館
地址：荔枝角長義街9號10F D2 Place One
查詢：2743 8055
大閘蟹套餐
大閘蟹套餐包括前菜、蟹皇翅、清蒸大閘蟹及淮揚蟹粉桂魚絲、生拆蟹粉等多款蟹粉菜，務求全方位滿足蟹迷！
十里洋場
地址：銅鑼灣恩平道28號利園二期101號舖
查詢：2338 5500
你或有興趣的文章：
点心代表 x 熊本熊 可愛點心登場
智能多功能煮食鍋 一煲搞掂3餐
2019-11-04,週一
入廚新手速學 揸刀必勝法
廚刀揸得好、揸得穩，切食材自然快靚正，亦可減少切親手嘅機會。刀具質素都好重要架，瑞士品牌 Victorinox 其中一個廚具系列 Swiss Modern，一直係愛下廚人士嘅心頭好，唔同刀款有唔同功能，例如切肉刀、麵包刀、牛扒刀、多用途廚房刀，仲有夠晒全面嘅三德刀，佢可以切肉、水果、蔬菜，因為刀身有坑槽，可以減少刀同食材之間嘅磨擦，咁就更順滑俐落啦！刀柄一向用歐洲胡桃木製成，12月會有新色推出，改用合成物料製成，輕身！摩登！型格！
Victorinox專門店：
海港城/2175 5888
東薈城/2151 0911
銅鑼灣祟光百貨/2833 8334
揸刀步驟：
1.拇指、食指先捏緊刀身近手柄位置。
2.餘下的3隻手指收在後面，握緊刀柄。
你或有興趣的文章：
【陳家廚坊煲湯系列】果皮陳皮大不同 切絲煲湯最理想
智能多功能煮食鍋 一煲搞掂3餐
2019-11-04,週一
東薈城Food Opera 米芝蓮食店進駐
東涌東薈城陸續有餐廳進駐，仲有個設計甚有特色嘅美食廣場Food Opera添，佢採用公共屋村、棚架等富本土特色嘅事物作為裝修主軸，好有親切感架。除咗人情味濃嘅用餐環境，仲可以食到米芝蓮級菜式！
場內有韓國屋、胡椒廚房、一本日式蛋包飯等日韓食店，加埋米芝蓮推介食府，就更有睇頭。例如連續9年獲選為米芝蓮推介食店嘅「泰潮」，由泰國廚師主理，招牌菜不能不介紹泰式滷水豬髀飯，滷水汁用十多種泰國香料調製成，完全滲入肉厚腍滑的豬後髀，豬皮爽彈不肥，再配上泰式酸菜和酸辣汁，十分醒胃！
另一人氣食府「天后站清湯腩」，由蘇師傅主理，有他助陣嘅清湯腩小店曾獲米芝蓮美譽！他後來自立門戶，親自嚴選優質食材，製岀濃而不膩的清湯腩。清澈湯底由紅棗、沙參等藥材熬製，牛味香濃的牛腩爽口有彈性，配白飯一流！還有特色崩沙腩擔擔麵，同樣肉質鮮美。
想品嚐更多東南亞風味，推介「三巡小廚」。「三巡小廚」一直創作岀多款創新南洋料理，例如海南雞鴛鴦雞飯套餐，飯餐一如既往配上蔥油飯和當歸雞湯，不過主菜變成傳統海南雞拼燒雞，一款口感嫩滑，一款表皮香脆，再沾上秘製醬汁，滋味雙倍！中式名點有首次進駐美食廣場嘅「御名軒」，經營超過廿七年，於天后總店為區內人所熟識。招牌蟲草花蒸雞飯，份量十足，選用無骨雞脾肉，鮮嫩且啖啖肉！
東薈城名店倉食代館Food Opera
地址：東涌達東路18-20號東薈城名店倉7樓704號舖
電話：2169 0791
你或有興趣的文章：
点心代表 x 熊本熊 可愛點心登場
蕃茄達人來了 東京健康沾麵店
2019-11-01,週五
点心代表 x 熊本熊 可愛點心登場
熊本縣吉祥物熊本熊誕生10週年，最近與香港「点心代表」聯乘合作！餐廳除了換上熊本熊的主題設計裝飾，連餐具都印上熊本熊部長的頭像。主角熊本熊紅黑造型點心，部份用上熊本縣入口的食材，順道推廣熊本縣的天然特產。
11款菜式、飲品鹹甜冷熱都有齊，特別介紹「金箔墨汁蝦餃」，蝦餃皮以墨魚汁和竹炭粉整成純黑的顏色，皮薄煙韌，有淡淡墨魚香氣。而餡料則用上原隻越南大蝦、豬肉及秘製豬油渣，湯汁滿滿，沾上秘製辣椒油，滋味加倍！另有「香煎熊本芋絲餅」，新鮮日本芋頭，加入蝦米、臘腸等配料，金黃的芋絲餅帶有臘香，香脆可口。日本匠人對烹飪要求一向高，所以多款點心上的圖案，都堅持由師傅精心繪製，每個都獨一無二，例如「熊本蜂蜜流心西多士」上的糖霜餠乾就是師傅的作品，大家要用心品嚐呀！
為配合主題，新特飲亦不少，其中「水果烏龍茶」以熊本熊特色凍杯盛載，大家可以$99優惠套裝價，直接將限量凍杯帶走。為了推廣環保，實踐走塑概念，餐廳會免費送岀熊本熊不銹鋼飲管套裝，不過只限首批顧客，並且限量500套，送完即止！
点心代表
地址：尖沙咀彌敦道100號The ONE 3樓L308號鋪
電話：2885 1345
你或有興趣的文章：
蕃茄達人來了 東京健康沾麵店
亞洲首間The Tiffany Blue Box Cafe 尖沙咀登場
2019-10-24,週四
【家常系列】 薯仔炆排骨
薯仔炆排骨係十大家常好菜之一（哈！其餘九大自己諗），簡單三樣材料就煮到，經濟實惠又易煮，點會唔受歡迎丫！
材料：
排骨1斤
洋葱1個
薯仔3個
做法：
1.排骨沖淨汆水，抹乾水分，備用。
2.下鹽及豉油略醃。
3.洋葱、薯仔去皮後切小塊。
4.熱鑊下油，分別爆香薯仔和洋葱。
5.熱油爆香薑和排骨。
6.加適量清水炆煮。
7.加入薯仔炒勻，下蠔油調味。
8.加洋葱炒勻，再略為炆煮即可享用。
你或有興趣的文章：
【女煮人Kinki系列】月見汁和牛粒飯
【1分鐘烹飪教室】香草醬汁T骨扒
2019-10-23,週三
蕃茄達人來了 東京健康沾麵店
健康飲食人人都識講，但係蕃茄達人TOMATOMAN嘅老闆就身體力行，將營養豐富嘅蕃茄熬成湯底配沾麵，唔止自己食，仲開店招呼埋你我他！蕃茄達人其實來自日本東京，主打蕃茄沾麵，口味不膩且清新，瞬間風靡東京，更曾受日本電視台訪問！
此店湯底每日精心熬製，嚴選雞、豬、野菜及蕃茄獨立熬煮3-5小時，以有機意大利蕃茄配合自家秘製和風湯煮成。客人可以按個人喜好選擇6個級別的辣度，由微辣到特級辣。辛辣口味由8種不同產地嘅辣椒經烤焗等工序炮製而成，同蕃茄濃湯好匹配，紅彤彤的湯底可見真材實料。
配料方面，沾麵上的汁煮叉燒，採用日本黑毛豬的肩胛用炮製，此部位油脂分佈適中，肉味厚實，沾上蕃茄濃湯好滋味。於日本掀起熱潮嘅芫荽蕃茄汁沾麵亦在香港餐牌之內，新鮮芫荽香味醒神，亦是TOMATOMAN招牌菜之一。此店用的秘製麵條，較坊間用的粗，彈牙俐落，配沾麵掛湯力強。
由於首次登陸香港，老闆亦特別為分店研發香港限定菜式蕃茄汁撈麵，以濃郁茄汁為基礎，撈麵醬汁微酸，加入青瓜及特製豬肉，辛香開胃。新店同時提供芝士粉飯(加$30)，可以用沾麵嘅蕃茄湯底伴飯食，再飽都要試一試呀！
蕃茄達人TOMATOMAN
地址：中環歌賦街 13 號地舖
電話：2511 6882
你或有興趣的文章：
一次過食9碗迷你海鮮丼 豊勝手丼
亞洲首間The Tiffany Blue Box Cafe 尖沙咀登場
2019-10-11,週五
一次過食9碗迷你海鮮丼 豊勝手丼
豊勝手丼主打海鮮丼飯，早前搬咗去銅鑼灣登龍街，同時加入多款新菜式！例如十分搶眼嘅九鼎丼，由9款迷你刺身丼飯組成，例如日本海膽、大拖羅、油甘魚、三文魚子、赤蝦、活北海道帆立貝等，視乎當日魚鮮或季節而定。還有份量十足的天丼，每碗3隻大虎蝦，另有蔬菜如蘆筍、冬菇、大葉、日本流心蛋等，好豐富。塩燒魚鮫丼、鵝肝丼同樣是新品，讓較喜歡熟食的客人亦有好選擇。
招牌海鮮丼自然繼續熱賣，包括拖羅丼，內有拖羅加海膽，鮮味幼滑。吞拿魚粉絲則要試試齊集3款吞拿魚滋味的吞拿魚丼，一口嚐盡吞拿魚、吞拿魚腩、碎蔥吞拿魚腩。北海蟹丼又是另類鮮味，由松葉蟹肉、松葉蟹腳、松葉蟹鉗、味噌蟹羔及蟹籽組成，啖啖肉架！
豊勝手丼
地址：銅鑼灣登龍街18號V Point 地下3號舖
電話：5546 5046
你或有興趣的文章：
亞洲首間The Tiffany Blue Box Cafe 尖沙咀登場
大阪3層梳乎厘Pancake 強勢登陸
2019-10-11,週五
【女煮人Kinki系列】月見汁和牛粒飯
一人簡餐好介紹！雖然都係牛肉飯，但改用一口和牛粒，貴氣啲、好味啲，加埋個牛肉蛋汁拌飯，好味程度直線上升！
材料：
一口和牛粒 10至12粒
味醂 125 ml
萬字醬油 100ml
日本煮酒 125ml
糖 6g
薑 2.5g
蒜 12.5g
青蔥 適量
生雞蛋黃 1隻
白飯 1碗
做法：
1.薑、蒜磨蓉。
2.萬字醬油、日本煮酒、味醂加入鍋中。
3.加入糖、薑蓉及蒜蓉煮熱。
4.煎香和牛粒。
5.醬汁加進和牛粒煮勻。
6.和牛粒放飯面，加入蛋黃及灑上蔥粒。
你或有興趣的文章：
【女煮人Kinki系列】泰好味 香煎鹹牛脷配酸辣汁
【女煮人Kinki系列】醒胃泰式生菜包
2019-10-11,週五
亞洲首間The Tiffany Blue Box Cafe 尖沙咀登場
全球第一間The Tiffany Blue Box Cafe 2017年於紐約開業，事隔兩年，品牌選址尖沙咀北京道一號，開其亞洲第一間、全球第二間分店。Cafe 10月14日才正式開幕，雖然開始接受網上訂座，但已全完爆滿，想試最快要等一星期，不如先看看有何心水菜式、甜品必試！十月尾前來幫襯，將送每位無酒精版Statement Blue作為Welcome Drink，那球粉藍棉花糖，好夢幻！
The Tiffany Blue Box Cafe用餐區分為兩部分，餐具、陳設同樣以藍白為主色調，不過喜歡自然光的朋友，可以選坐近門口、以銀藍玻璃作間隔的區域，簡約且開揚。另一邊廂注入更多Tiffany元素，舉目盡是經典Tiffany Blue。在這樣的環境下，易令人聯想到Afternoon Tea。店家當然了解女生的想法，所以準備了三層Tiffany Afternoon Tea($688/兩位)給大家打卡兼品嚐。鹹甜點包括香檳珍珠、魚子醬撻、士多啤梨三重奏、鴨肝醬凍球、小紅莓鬆餅等不能盡錄！
頭盤、主菜亦相當出色，設兩道菜($358)及三道菜($458)選擇，清爽的龍蝦沙律以香橙薑醬汁作調味，是開胃Starter的不二之選。主菜龍蝦扁意粉、海鮮意大利飯、番紅花燉飯，皆足料香濃。特別是龍蝦扁意粉的醬汁，以龍蝦頭及蝦殼熬煮十一小時而成，真材實料。甜品無論是焦糖爆谷朱古力撻或牛奶布甸都相當吸睛，前者撻內是滿滿的榛子杏仁朱古力醬及芝士，配以焦糖爆谷，童心未泯。
買過Tiffany & Co.的產品、嚐過新店的菜式，不如訂埋它的蛋糕一試！The Tiffany Blue Box Cafe是個巨形禮物盒，由海鹽焦糖味及白芝麻味慕絲、杏仁朱古力脆及朱古力海綿蛋糕組成，同樣可以網上訂購。
The Tiffany Blue Box Cafe Hong Kong
地址：尖沙咀北京道1號大堂208號舖
開幕日期：2019年10月14日
預約請按：chope
*只接受網上預約
2019-10-10,週四